15 قاراشادا قازاقستان سۋرەتشىلەر وداعىنىڭ باسقارماسىنىڭ ءتوراعالىعىنا سايلاۋ وتەدى. 4 جىلدا ءبىر كەلەتىن  سايلاۋعا بايلانىستى Qamshy.kz اقپارات اگەنتتىگىنىڭ ءتىلشىسى سايلاۋعا قاتىسۋشىلاردىڭ ءبىرى الماس سەرىكۇلىمەن سۇحباتتاستى.

العاشقى سۇراعىمدى ءسىزدىڭ وتكەن ومىرىڭىزبەن، بالالىق شاعىڭىزبەن  بايلانىستىرعىم كەلىپ وتىر. بالا كەزىڭىزدەن سۋرەتكە قۇمار بولدىڭىز با الدە ارمان-ماقساتىڭىز مۇلدەم بولەك بولدى ما؟ وسى جايلى ەستەلىكتەرىڭىزبەن بولىسسەڭىز.

مەن كىشكەنە كەزىمنەن بەينەلەۋ ونەرىنە قۇمارتىپ، سول ارمانمەن اباي اتىنداعى قازۇپۋ-دىڭ كوركەم سۋرەت فاكۋلتەتىن 2009 جىلى ءتامامداپ، سۋرەتشى شەبەر بولدىم.  2011 جىلى "عالامارت" شىعارماشىل جاستار كلۋبىن قۇرىپ، جۇمىس جاسادىم. 2 جىلدا ءتورت كورمە وتكىزدىك. ارمانىمىز قازاق جاستارىن الەممەن بايلانىستا جۇمىس جاساتۋ بولعان. وكىنىشكە قاراي ول ارمانعا قارجىلىق كەدەرگىلەر بولدى. ءبىز قۇرعان كلۋبتا ءوز قارجىسى بولمادى، بولماسا دا دەمەۋشىسىز جۇمىس جاسادىق. كەز كەلگەن جۇمىس دەمەۋشىمەن نەمەسە ءوز قاراجاتىڭمەن ىسكە اسادى. سول سەبەپتەن ءبارىن دوعارىپ تازا كاسىپكەرلىككە كەتتىم. ويتكەنى كاسىپ جاساساق ماسەلەنى ەشكىمنىڭ كومەگىنسىز شەشە الاتىن ەدىك! سول ويمەن ءالى كەلەمىز.

ءوزىڭىزدىڭ فەيسبۋك پاراقشاڭىزدا «سۋرەتشىلەر وداعىنا الىستان كەلگەنىم جوق، جەتى جىل قويان قولتىق ارالاستىم، وسىنداعى ماسەلەلەرمەن بارىنشا قانىقپىن»، - دەپ جازىپسىز. ەگەر سايلاۋ كەزىندە جەڭىسكە جەتىپ، سۋرەتشىلەر وداعى باسقارماسىنىڭ ءتوراعاسى بولىپ تاعايىندالساڭىز ەڭ الدىمەن قانداي وزگەرىستەر ەنگىزەر ەدىڭىز؟ كوپشىلىك سايلاۋ الدى ۋادەلەرگە وڭايلىقپەن سەنە قويمايتىنىن جاقسى بىلەتىن دە شىعارسىز. سايلاۋ الدى ايتقان سوزدەرىڭىز بوس ءسوز بولىپ قالمايدى ما؟

سۋرەتشىلەر وداعىنا سايلاۋعا ءتۇسۋ ءۇشىن ەشكىمگە ۋادە بەرمەدىم. مەنىڭ ەشقانداي ىشكى ەسەبىم جوق. مەنىڭ ويىم قازىرگى ەسكى جۇمىس ىستەي المايتىن مودەلدى وزگەرتۋ.  مەنى قولدايتىندار — جاڭالىق كۇتكەندەر.  مەنىڭ ويىم نارىق زاڭدارىنا ساي. ءار سۋرەتشى ءوزىن قامتاماسسىز ەتەتىن قاجەتتى ءبىلىم بەرسەك سول ەڭ ۇلكەن جەڭىس بولادى.

وسىدان ءبىراز ۋاقىت بۇرىن سايلاۋ الدىندا ۇلكەن داۋ تۋىنداعان ەدى. جەرگىلىكتى باق-تىڭ بىرىندە «باسشىلىققا ۇمىتكەر ەكى تۇلعانىڭ اراسىنداعى «كرەسلوعا تالاس» قىلقالام شەبەرلەرىن بىر-بىرىنە ايداپ سالعانداي. اينالدىرعان 30-40 سۋرەتشى وداق عيماراتىن باسىنا كوتەردى» دەپ جاريالانعان بولاتىن. وسى تۋرالى نە ايتا الاسىز؟

ءيا، سول داۋعا، ءبىر بىرىنە جازىلعان ارىزعا ىزا بولعان جاس سۋرەتشىلەر داۋدى ءوزارا تالقىلاعان. مەنى ۇسىنعان دا سول جاس زامانداس ارىپتەستەرىم. ويتكەنى مەنىڭ ويىم ولارعا ۇنادى. شىنايى  اقپارات كىمگە بولسا دا جاعادى.

سول داۋدان كەيىن ءبىرىنشى xاتشىعا xابارلاسىپ وزدەرىنىڭ اتىنان مەنىڭ دە داۋىسقا تۇسكەنىمدى قالادى. باسىندا قارسى بولعام، كەيىننەن ءوزىم كەلىسىم بەردىم. ويتكەنى مەن دە وزگەرىستى قالايمىن

قازاقستانداعى سۋرەتشىلەردىڭ الاتىن ءرولى قانداي؟ سۋرەت ونەرىمەن ءقازىر ەشكىمدى تاڭعالدىرا المايسىز دەگەن پىكىرمەن كەلىسەسىز بە؟

بەينەلەۋ ونەرى ءوز الدىنا الەمدە ماتەريالدىق قۇندىلىق، شىنداپ قاراعاندا بۇل كەز كەلگەن بالامالى قۇندىلىقتان جوعارى. التىن باعاسىن ءتۇسىرۋى مۇمكىن،  مۇناي، دوللار ءبارى قۇبىلمالى. ال سۋرەتشىنىڭ ءونىمى تەك  باعاسى وسۋمەن بولادى. ەشقاشان قۇنىن جوعالتپايدى

ءسىز ءبىر سوزىڭىزدە «سۋرەتشى ءوز بيىگىندە سۋرەتشى بولۋ كەرەك»، - دەپسىز. ءسىز ءوز بيىگىڭىزدى باعىندىرا الدىڭىز با؟ ءسىزدىڭ وزگە سۋرەتشىلەردىڭ اراسىندا دارالاندىرىپ تۇراتىن قانداي ەرەكشەلىگىڭىز بار؟ شىعارماشىلىعىڭىزدىڭ قانداي وزگەشەلىگى بار؟

مەن ءوزىم ارمانداعان دودالار مەن شىڭدارىمدى ۋاقىتىنان ەرتە باعىندىردىم، ءبارى مەن ءۇشىن تەك بەلەستەر ەكەنىنە كوزىم جەتتى.  وتىز جاسقا دەيىن قازاقستاندا جاس شەبەرلەر قاتىساتىن قانداي كونكۋرس بار، ءبارىنىڭ باس جۇلدەسىن الدىم. شەتەلدەن دە التىن القا تاققان كەزىمىز بولدى. ياعني مەنى وسى پوستتا كورگىسى كەلەتىن جاستار مەنىڭ ءومىر جولىما قىزىعادى جانە دۇرىس سانايدى. ايتپەسە مەن دە قاتارداعى قازاق ازاماتىمىن. بارىنەن تالانتتىمىن دەپ ايتا المايمىن. ويلاعانىمدى دەر كەزىندە جۇزەگە اسىرۋعا تالپىنامىن، ماركەتينگ-مەنەدجمەنت تۋرالى كوپ ىزدەنەمىن. سۋرەتشى ءوز بيىگىندە تۇرسا ولاردا الەۋمەتتىك پروبلەمالار بولمايدى. ول ءۇشىن زاماناۋي ءبىلىم كەرەك.

سۇحباتىڭىزعا راحمەت. سايلاۋدا ساتتىلىك سەرىگىڭىز بولسىن!

سۇحباتتاسقان: اسەل بولات قىزى